債務糾紛共同事拍死 湳仔坑查埔人載屍投案

公視新聞網 https://news.pts.org.tw/article/829530

債務糾紛共同事拍死 湳仔坑查埔人載屍投案

發布時間：2026/10/1 20:19 更新時間：2026/10/1 20:19

許嘉茹 邱紹揚 高雄報導

高雄湳仔坑有一个查埔人昨暗（9/30）報案，講家己和同事冤家煞共拍死，閣用車共屍體載來分局投案。警方調查，in兩人攏是車行的員工，嫌犯講是為著10萬箍的糾紛tshiâu袂好勢才會共人拍死，目前檢警也當咧調查。（標題、内文皆為台文）

吳征揚/編輯

=====

三十暗時倚十點，高雄楠仔坑分局外面，一台車寬寬駛入來停車場，駛車的駕駛是二十二歲姓穆的查埔人。伊佇暗時七點外報案講家己刣死人欲自首，尾手誠實駛車載屍體來分局投案。警方表示，姓穆的嫌犯佮姓張的死者是同事，兩人攏佇咧車行食頭路，嫌犯講兩人是為著十萬箍的糾紛，佇咧公司起冤家，一時失手共人拍死的。

高雄市楠梓分局偵查隊長 宋國源：

嫌犯講伊是用熱熔膠，大約一公尺長的熱熔膠來拍死者，抑若這个兇器，這項證物擲佇咧佗位，抑是敢有其他的兇器，阮愛進一步偵訊來理清。

嫌犯講家己原底想欲共死者載去台東擲，後來知影走袂離才翻頭轉來投案。警方透過車牌辨識系統證實，嫌犯佮死者三十中晝攏無去上班，敢若是前一暝就共人拍死，駛車載去台東，才閣翻頭轉來投案。早起鑑識人員嘛來公司giú封鎖線搜證，警方表示，目前兇器猶未揣著，到底嫌犯講的是毋是事實，檢調當咧理清。

高雄市楠梓分局偵查隊長 宋國源：

臺東市有揣著死者手機仔的一寡仔零件，早前佇咧高雄市的仁武地區興西路有揣著嫌犯擲掉的手機仔，已經送請本局刑事警察大隊科偵隊來鑑識當中。

家屬中晝來到殯儀館，檢察官嘛進行相驗。看著二十二歲的後生，因為十萬箍就按呢無命去，阿母是吼甲講袂出話。警方表示，姓穆的查埔人敢是兇手，是毋是有其他的共犯，相關的案情疑點，攏需要等待進一步的調查理清。

--